आमोद्यात दुर्दैवी अपघात; टीव्ही संच कोसळून १३ वर्षीय बालिकेचा मृत्यू

 

आमोद्यात दुर्दैवी अपघात; टीव्ही संच कोसळून १३ वर्षीय बालिकेचा मृत्यू

लेवा जगत न्यूज | आमोदा, ता. यावल

यावल तालुक्यातील आमोदा येथे अत्यंत दुर्दैवी घटना घडली असून घरातील टीव्ही संच अचानक कोसळल्याने १३ वर्षीय बालिकेचा मृत्यू झाला. या घटनेमुळे परिसरात हळहळ व्यक्त होत आहे.

मिळालेल्या माहितीनुसार, नाजमीन मोहम्मद इसाक पिंजारी (वय १३) ही रविवारी पहाटे आपल्या घरात असताना हा अपघात घडला. घरातील एका कोठीवर ठेवलेला टीव्ही संच अचानक खाली पडून तिच्या डोक्यावर आदळला. या धडकेत ती गंभीर जखमी झाली.

घटनेनंतर कुटुंबीयांनी तातडीने तिला उपचारासाठी रुग्णालयात नेले. प्राथमिक उपचारानंतर पुढील उपचारासाठी भुसावळ येथील रुग्णालयात हलविण्यात आले. मात्र, उपचारादरम्यान तिची प्रकृती अधिकच गंभीर बनली आणि डॉक्टरांनी तिला मृत घोषित केले.

नाजमीन ही स्थानिक शाळेत शिक्षण घेत होती. तिच्या अकाली निधनामुळे शाळा, मित्रपरिवार आणि गावात शोककळा पसरली आहे. गरीब कुटुंबातील असलेल्या या बालिकेच्या निधनाने कुटुंबावर दुःखाचा डोंगर कोसळला असून परिसरातील नागरिकांनी कुटुंबीयांप्रती संवेदना व्यक्त केल्या आहेत.

या प्रकरणी संबंधित यंत्रणांना माहिती देण्यात आली असून पोलिसांनी अकस्मात मृत्यूची नोंद करून पुढील तपास सुरू केला आहे. शवविच्छेदनाची प्रक्रिया पूर्ण करण्यात आली असून घटनेच्या नेमक्या कारणांचा तपास केला जात आहे.

घरामध्ये जड वस्तू, टीव्ही किंवा इतर उपकरणे सुरक्षितपणे बसविणे आणि मुलांच्या आवाक्याबाहेर ठेवणे किती महत्त्वाचे आहे, याची जाणीव करून देणारी ही घटना ठरली आहे.