पिंपरी-चिंचवडमध्ये दोन सख्ख्या बहिणींवरील लैंगिक अत्याचार; ६५ वर्षीय आरोपी अटकेत

 

पिंपरी-चिंचवडमध्ये दोन सख्ख्या बहिणींवरील लैंगिक अत्याचार; ६५ वर्षीय आरोपी अटकेत

पुणे लेवाजगत न्यूज प्रतिनिधी-

पुणे जिल्ह्यातील पिंपरी-चिंचवड शहरात दोन अल्पवयीन सख्ख्या बहिणींवर शेजारी राहणाऱ्या ६५ वर्षीय व्यक्तीने कथित लैंगिक अत्याचार केल्याची धक्कादायक घटना समोर आली आहे. या प्रकरणी वाकड पोलीस ठाण्यात पॉक्सो (POCSO) कायद्यासह अन्य संबंधित कलमांन्वये गुन्हा दाखल करण्यात आला असून आरोपीला अटक करण्यात आली आहे.

पोलिसांनी दिलेल्या माहितीनुसार, पीडित मुलींचे कुटुंब आणि आरोपीचे कुटुंब मजुरीचे काम करते. घरातील मोठी मंडळी कामावर गेल्यानंतर १० वर्षांची मुलगी आणि तिची ४ वर्षांची बहीण घरी एकट्या असताना आरोपीने मोठ्या मुलीला जबरदस्तीने आपल्या घरात नेऊन तिच्यावर अत्याचार केल्याचा आरोप आहे.

हा प्रकार शेजारी राहणाऱ्या एका महिलेच्या निदर्शनास आल्यानंतर तिने संध्याकाळी मुलीच्या पालकांना माहिती दिली. त्यानंतर पालकांनी मुलीशी संवाद साधला असता, तिने घडलेला प्रकार सांगितल्याचे तक्रारीत नमूद आहे.

तक्रारीनुसार, आरोपीने मागील काही महिन्यांत १० वर्षीय मुलीवर वारंवार अत्याचार केल्याचा तसेच ४ वर्षीय बहिणीवरही एकदा अत्याचार केल्याचा आरोप आहे. कोणालाही माहिती दिल्यास जीवे मारण्याची धमकी दिल्याचेही तक्रारीत नमूद करण्यात आले आहे.

पीडित कुटुंबाच्या तक्रारीनंतर वाकड पोलिसांनी आरोपीविरुद्ध पॉक्सो कायद्यासह लागू असलेल्या अन्य गंभीर कलमांन्वये गुन्हा नोंदवून त्याला अटक केली आहे. या प्रकरणाचा पुढील तपास पोलीस करत आहेत.