रक्तदान व थॅलेसेमिया तपासणीद्वारे सामाजिक बांधिलकी जपणारा विवेकानंद एज्युकेशन सोसायटी महाविद्यालयाचा उपक्रम

 

रक्तदान व थॅलेसेमिया तपासणीद्वारे सामाजिक बांधिलकी जपणारा विवेकानंद एज्युकेशन सोसायटी महाविद्यालयाचा उपक्रम

उरण-

विवेकानंद एज्युकेशन सोसायटीच्या कला, विज्ञान आणि वाणिज्य महाविद्यालयाने (स्वायत्त) राष्ट्रीय सेवा योजना (NSS) आणि रोटरी क्लब ऑफ चेंबूर यांच्या संयुक्त विद्यमाने रक्तदान शिबिर व थॅलेसेमिया तपासणी शिबिराचे यशस्वी आयोजन करून सामाजिक बांधिलकीचे दर्शन घडविले.

या उपक्रमासाठी एस. एल. रहेजा रुग्णालय आणि लोकमान्य टिळक महानगरपालिका सर्वसाधारण रुग्णालय (LTMGH) येथील रक्तपेढ्यांनी सहकार्य केले. शिबिरात विद्यार्थी, प्राध्यापक आणि शिक्षकेतर कर्मचाऱ्यांनी उत्स्फूर्त प्रतिसाद देत ७२ जणांनी स्वेच्छेने रक्तदान केले. त्यातून एकूण ३२,४०० मिली रक्त संकलित करण्यात आले. तसेच ११६ विद्यार्थ्यांची थॅलेसेमिया तपासणी करण्यात आली. या माध्यमातून आनुवंशिक रक्तविकारांच्या लवकर निदानाबाबत जनजागृती होण्यास आणि प्रतिबंधात्मक आरोग्यसेवेबाबत जागरूकता वाढण्यास मदत झाली.

यावेळी महाविद्यालयाच्या प्राचार्या डॉ. अनीता कंवर यांनी सांगितले की, शिक्षण हे केवळ वर्गखोल्यांपुरते मर्यादित नसून सामाजिकदृष्ट्या जबाबदार नागरिक घडविणे हे महाविद्यालयाचे प्रमुख ध्येय आहे. विद्यार्थी व कर्मचाऱ्यांचा उत्स्फूर्त सहभाग त्यांच्या सेवाभावाचा आणि समाजासाठी योगदान देण्याच्या वचनबद्धतेचा प्रत्यय देणारा आहे. हा उपक्रम यशस्वी करण्यासाठी रोटरी क्लब ऑफ चेंबूर, एस. एल. रहेजा रुग्णालय, LTMGH तसेच राष्ट्रीय सेवा योजना विभागाचे त्यांनी आभार मानले.

या उपक्रमामुळे विद्यार्थ्यांना समाजोपयोगी कार्यात प्रत्यक्ष सहभागी होण्याची संधी मिळाली. त्यांच्यामध्ये सहानुभूती, सामाजिक उत्तरदायित्व आणि सामुदायिक सहभाग यांसारख्या मूल्यांची जोपासना झाली. अशा उपक्रमांद्वारे विवेकानंद एज्युकेशन सोसायटीचे कला, विज्ञान आणि वाणिज्य महाविद्यालय सर्वांगीण शिक्षणासोबत सामाजिक बांधिलकीची जाणीवही विद्यार्थ्यांमध्ये रुजवत असल्याचे या कार्यक्रमातून अधोरेखित झाले.