डॉ.उल्हास पाटील रुग्णालयात ७२ वर्षीय महिलेवर पामीची यशस्वी शस्त्रक्रिया

हृदयविकार तज्ज्ञांकडून अत्याधुनिक उपचार; शासकीय आरोग्य योजनेअंतर्गत मोफत उपचाराचा लाभ

लेवाजगत न्यूज जळगाव : येथील डॉ. उल्हास पाटील रुग्णालयात थोरगव्हाण येथील ७२ वर्षीय महिलेवर हृदयविकाराशी संबंधित पामी (PAMI) ही शस्त्रक्रिया यशस्वीरीत्या करण्यात आली. हृदयविकार तज्ज्ञांच्या मार्गदर्शनाखाली अत्याधुनिक कॅथलॅबच्या सहाय्याने करण्यात आलेल्या या उपचारामुळे महिलेच्या हृदयातील गंभीर रक्तवाहिनी अडथळ्यावर यशस्वी उपचार करण्यात आला. विशेष म्हणजे, शासकीय आरोग्य योजनेअंतर्गत संबंधित रुग्णाला मोफत उपचाराचा लाभ मिळाल्याने कुटुंबाला मोठा आर्थिक दिलासा मिळाला.

थोरगव्हाण येथील ७२ वर्षीय महिला हृदयाशी संबंधित त्रासामुळे डॉ. उल्हास पाटील रुग्णालयात उपचारासाठी दाखल झाली होती. हृदयालय विभागप्रमुख डॉ. वैभव पाटील यांच्या मार्गदर्शनाखाली हृदयविकार तज्ज्ञ डॉ. अली अदनान यांनी रुग्णाची तपासणी करून आवश्यक वैद्यकीय चाचण्या केल्या. तपासणीच्या अहवालात हृदयाच्या रक्तवाहिन्यांमध्ये गंभीर अडथळा असल्याचे निदर्शनास आले.

रुग्णाचे वाढते वय आणि हृदयाची स्थिती लक्षात घेऊन तज्ज्ञ डॉक्टरांच्या पथकाने आवश्यक उपचार करण्याचा निर्णय घेतला. त्यानुसार रुग्णावर पामी शस्त्रक्रिया करण्यात आली.

टीमच्या अथक प्रयत्नांना यश

अत्याधुनिक कॅथलॅबच्या सहाय्याने हृदयविकार तज्ज्ञ डॉ. वैभव पाटील, डॉ. अली अदनान आणि डॉ. झिशान सय्यद यांच्या टीमने ही प्रक्रिया यशस्वीरीत्या पूर्ण केली. शस्त्रक्रियेदरम्यान रुग्णाच्या हृदयाची स्थिती सातत्याने निरीक्षणाखाली ठेवण्यात आली. तज्ज्ञ डॉक्टर, भूलतज्ज्ञ, परिचारिका आणि तांत्रिक कर्मचाऱ्यांच्या समन्वयातून ही शस्त्रक्रिया यशस्वी झाली.

वयोमान अधिक असूनही अत्याधुनिक वैद्यकीय सुविधा, अनुभवी हृदयविकार तज्ज्ञ आणि प्रशिक्षित वैद्यकीय पथकामुळे उपचार यशस्वी झाल्याचे रुग्णालय प्रशासनाने सांगितले.

या उपचाराचे आणखी एक वैशिष्ट्य म्हणजे रुग्णाला शासकीय आरोग्य योजनेअंतर्गत मोफत शस्त्रक्रियेचा लाभ मिळाला. त्यामुळे महिलेच्या कुटुंबावरील उपचाराचा आर्थिक भार कमी झाला.

हृदयविकाराची लक्षणे दुर्लक्षित करू नका

“हृदयविकाराची लक्षणे दिसून आल्यास वेळ न दवडता तज्ज्ञ डॉक्टरांचा सल्ला घेणे अत्यंत महत्त्वाचे आहे. विशेषतः ज्येष्ठ नागरिकांनी छातीत दुखणे, धाप लागणे, घाम येणे, अस्वस्थपणा किंवा अचानक अशक्तपणा जाणवल्यास तातडीने वैद्यकीय तपासणी करून घ्यावी,” असे आवाहन डॉ. अली अदनान, डॉ. उल्हास पाटील रुग्णालय यांनी केले.