८३ वर्षीय वृद्धाची मृत्यूशी झुंज; मेंदूवरील यशस्वी शस्त्रक्रियेनंतर सुखरूप घरी

लेवाजगत न्यूज जळगाव : वयाच्या ८३व्या वर्षी अचानक झालेल्या गंभीर मेंदूविकारावर मात करत भाऊराव खिरडकर यांनी अक्षरशः मृत्यूशी दोन हात केले. घरात पडल्यामुळे झालेल्या दुखापतीनंतर काही दिवस प्रकृती ठीक वाटत असतानाच अचानक डावा हात-पाय कमजोर पडून त्यांना शुद्ध हरपली. कुटुंबीयांनी तातडीने त्यांना डॉ. उल्हास पाटील रुग्णालयात दाखल केले. येथे वेळेत निदान झाल्यानंतर त्यांच्या मेंदूवरील रक्तस्रावाची तातडीने शस्त्रक्रिया करण्यात आली. काही काळ व्हेंटिलेटरवर उपचार घेतल्यानंतर त्यांनी उपचारांना प्रतिसाद देत अखेर सुखरूप घरी परतण्याचा आनंद कुटुंबीयांना दिला.

भाऊराव खिरडकर (वय ८३) हे महिनाभरापूर्वी घरात पडले होते. त्यानंतर त्यांनी प्राथमिक उपचार घेतले होते. काही दिवस प्रकृतीत सुधारणा झाल्याने कुटुंबीयांनीही सुटकेचा निःश्वास सोडला होता. मात्र अचानक त्यांच्या डाव्या हात-पायाची हालचाल कमी झाली आणि ते बेशुद्ध झाले. परिस्थिती गंभीर असल्याचे लक्षात येताच कुटुंबीयांनी विलंब न करता त्यांना डॉ. उल्हास पाटील रुग्णालयात दाखल केले.

रुग्णालयात दाखल केल्यानंतर मेंदूविकार तज्ज्ञ डॉ. विपूल राठोड यांनी त्यांची तपासणी केली. तातडीने सीटी स्कॅन करण्यात आला. त्यामध्ये मेंदूमध्ये मोठ्या प्रमाणात रक्तस्राव झाल्याचे निदान झाले. वयाच्या ८३व्या वर्षी ही स्थिती अत्यंत नाजूक होती. मात्र वेळ न दवडता शस्त्रक्रिया करणे आवश्यक असल्याचा निर्णय डॉक्टरांनी घेतला.

डॉ. विपूल राठोड यांच्या मार्गदर्शनाखाली सुमारे दोन तासांची फ्रंटल अँड पॅरायटल क्रेनिओटोमी शस्त्रक्रिया करण्यात आली. या शस्त्रक्रियेद्वारे मेंदूमध्ये साचलेले रक्त बाहेर काढून मेंदूवरील दबाव कमी करण्यात आला. या उपचारात डॉ. प्रितम दास, डॉ. श्रृती खंडागळे, डॉ. अनुष्का, भूलशास्त्र तज्ज्ञ डॉ. सतीश, डॉ. साक्षी आणि डॉ. ललिता यांनी सहकार्य केले.

शस्त्रक्रियेनंतर भाऊराव यांना काही काळ व्हेंटिलेटरवर ठेवण्यात आले. अतिदक्षता विभागात डॉक्टर व वैद्यकीय पथकाने त्यांच्यावर सातत्याने उपचार व निरीक्षण केले. वय, मेंदूतील रक्तस्राव आणि शस्त्रक्रियेनंतरची गंभीर अवस्था अशा अनेक आव्हानांवर मात करत त्यांच्या प्रकृतीत हळूहळू सुधारणा होऊ लागली.

उपचारांना चांगला प्रतिसाद मिळाल्यानंतर त्यांना व्हेंटिलेटरवरून बाहेर काढण्यात आले. प्रकृतीत लक्षणीय सुधारणा झाल्यानंतर भाऊराव स्वतःच्या पायावर सुखरूप घरी परतले. या उपचाराचा लाभ संबंधित शासकीय आरोग्य योजनेंतर्गत मिळाल्याने शस्त्रक्रिया व उपचार मोफत झाल्याने कुटुंबीयांवरील आर्थिक भारही कमी झाला.

वेळेत उपचार महत्त्वाचे — डॉ. श्रृती खंडागळे

“मेंदूमध्ये रक्तस्राव झाल्यानंतर रुग्णाची प्रकृती अत्यंत गंभीर होऊ शकते. अशावेळी वेळेत निदान आणि आवश्यकतेनुसार तातडीने शस्त्रक्रिया करणे अत्यंत महत्त्वाचे असते. भाऊराव यांचे वय अधिक असूनही त्यांना वेळेत रुग्णालयात दाखल केल्यामुळे योग्य उपचार करता आले. शस्त्रक्रियेनंतर त्यांना व्हेंटिलेटरची आवश्यकता भासली. मात्र उपचारांना चांगला प्रतिसाद मिळाल्याने त्यांची प्रकृती सुधारली आणि ते सुखरूप घरी परतले,” अशी माहिती डॉ. श्रृती खंडागळे, डॉ. उल्हास पाटील रुग्णालय यांनी दिली.