गोदावरी तंत्रनिकेतनतर्फे आरंभ कार्यक्रम उत्साहात संपन्न विद्यार्थ्यांना शैक्षणिक, तांत्रिक व व्यक्तिमत्त्व विकासाबाबत मार्गदर्शन; पालक मेळाव्यालाही उत्स्फूर्त प्रतिसाद

 

गोदावरी तंत्रनिकेतनतर्फे आरंभ कार्यक्रम उत्साहात संपन्न

विद्यार्थ्यांना शैक्षणिक, तांत्रिक व व्यक्तिमत्त्व विकासाबाबत मार्गदर्शन; पालक मेळाव्यालाही उत्स्फूर्त प्रतिसाद

जळगाव | प्रतिनिधी

गोदावरी फाउंडेशन संचलित गोदावरी तंत्रनिकेतन, जळगाव येथे प्रथम वर्षाच्या नव्याने प्रवेश घेतलेल्या विद्यार्थ्यांसाठी दोन दिवसीय ‘आरंभ (इंडक्शन) कार्यक्रम २०२६-२७’ उत्साहात पार पडला. १७ व १८ ऑगस्ट रोजी आयोजित करण्यात आलेल्या या कार्यक्रमाचा उद्देश विद्यार्थ्यांना महाविद्यालयीन वातावरण, शैक्षणिक पद्धती, उपलब्ध विविध संधी तसेच विद्यार्थी म्हणून असलेल्या जबाबदाऱ्यांची ओळख करून देणे हा होता.

कार्यक्रमाची सुरुवात सरस्वती पूजन व नवागत विद्यार्थ्यांच्या स्वागताने झाली. गोदावरी फाउंडेशन संचलित गोदावरी अभियांत्रिकी महाविद्यालयाचे प्राचार्य डॉ. विजयकुमार पाटील यांनी विद्यार्थ्यांना मार्गदर्शन करताना नवीन गोष्टी शिकण्याची वृत्ती, आत्मविश्वास, संवादकौशल्य, व्यक्तिमत्त्व विकास, शिस्त तसेच तांत्रिक व व्यावसायिक कौशल्ये विकसित करण्याचे महत्त्व स्पष्ट केले.

तंत्रनिकेतन समन्वयक प्रा. दीपक झांबरे यांनी महाविद्यालयीन नियम, शैक्षणिक धोरणे, शिस्त, उपस्थिती तसेच विविध शैक्षणिक व सहशैक्षणिक उपक्रमांमध्ये सक्रिय सहभागाचे महत्त्व विद्यार्थ्यांना समजावून सांगितले. विद्यार्थ्यांनी संस्थेत उपलब्ध सुविधा व संधींचा पुरेपूर उपयोग करावा, असे आवाहनही त्यांनी केले.

दुपारच्या सत्रात GIMR, जळगावचे संचालक डॉ. प्रशांत वारके यांनी ‘Human Values, Creativity and Gender Equality’ या विषयावर मार्गदर्शन केले. मानवी मूल्ये, परस्पर आदर, सर्जनशील विचार, जबाबदार वर्तन आणि समानतेचे महत्त्व त्यांनी विद्यार्थ्यांना पटवून दिले. यानंतर विविध समित्यांची ओळख, प्रथम वर्ष विभागातील प्राध्यापकांशी परिचय तसेच विद्यार्थ्यांच्या क्षमतांची ओळख करून त्यांचा विकास करण्याबाबत मार्गदर्शन करण्यात आले.

पालक मेळाव्यात विद्यार्थ्यांच्या सर्वांगीण विकासावर भर

कार्यक्रमाच्या दुसऱ्या दिवशी प्रथम वर्षाच्या विद्यार्थ्यांसाठी पालक मेळाव्याचे आयोजन करण्यात आले. यावेळी पालकांची मोठ्या संख्येने उपस्थिती होती. डॉ. विजयकुमार पाटील यांनी पालकांना मार्गदर्शन करताना विद्यार्थ्यांचा सर्वांगीण विकास ही विद्यार्थी, पालक आणि प्राध्यापक या तिघांची संयुक्त जबाबदारी असल्याचे सांगितले.

पालकांनी विद्यार्थ्यांना योग्य पाठिंबा द्यावा, त्यांच्या क्षमता व अडचणी समजून घ्याव्यात आणि त्यांच्याशी सकारात्मक संवाद साधावा, असे त्यांनी स्पष्ट केले. यावेळी पालकांनी विद्यार्थ्यांच्या विकासाबाबत तसेच संस्थेकडून असलेल्या अपेक्षा व सूचनांबाबत मौल्यवान अभिप्राय दिला.

प्रा. दीपक झांबरे यांनीही विद्यार्थ्यांना योग्य स्वातंत्र्य व आवश्यक अवकाश देणे, त्यांना समजून घेणे आणि त्यांच्याशी नियमित संवाद साधणे महत्त्वाचे असल्याचे सांगितले.

माजी विद्यार्थ्यांकडून करिअरविषयक मार्गदर्शन

यानंतर माजी विद्यार्थ्यांशी संवाद सत्र आयोजित करण्यात आले. डिप्लोमा पूर्ण केलेल्या माजी विद्यार्थ्यांनी प्रथम वर्षाच्या विद्यार्थ्यांशी संवाद साधत आपले शैक्षणिक अनुभव, करिअरचा प्रवास, आलेल्या अडचणी तसेच भविष्यातील वाटचालीसाठी उपयुक्त मार्गदर्शन केले.

कार्यक्रमाच्या अंतिम सत्रात ‘K’ Scheme बाबत मार्गदर्शन करण्यात आले. शासकीय तंत्रनिकेतन, जळगावचे प्राचार्य डॉ. पी. पी. चौधरी तसेच अधिष्ठाता प्रा. नितीन पाटील यांनी विद्यार्थ्यांना ‘K’ Scheme, शैक्षणिक रचना, मूल्यमापन पद्धती, क्रेडिट्स आणि तंत्रनिकेतन शिक्षणातील विविध महत्त्वाच्या बाबींची माहिती दिली.

हा दोन दिवसीय कार्यक्रम इंडक्शन प्रोग्राम समन्वयक प्रा. नेहा चौधरी व प्रा. हर्षा पाटील यांच्या समन्वयातून तसेच प्रथम वर्ष विभागातील सर्व प्राध्यापकांच्या सहकार्याने यशस्वीपणे पार पडला. कार्यक्रमाचे सूत्रसंचालन प्रा. वेणू फिरके यांनी केले.

या कार्यक्रमाला प्रथम वर्ष तंत्रनिकेतनचे विद्यार्थी मोठ्या संख्येने उपस्थित होते. कार्यक्रमातून विद्यार्थी व पालकांना शैक्षणिक तसेच व्यक्तिमत्त्व विकासाबाबत मौल्यवान मार्गदर्शन मिळाले. नव्या शैक्षणिक प्रवासाची सकारात्मक सुरुवात करत कार्यक्रमाचा समारोप उत्साहपूर्ण वातावरणात झाला.

कार्यक्रमाच्या यशस्वी आयोजनाबद्दल गोदावरी फाउंडेशनचे अध्यक्ष डॉ. उल्हास पाटील, सचिव डॉ. वर्षा पाटील, सदस्य डॉ. केतकी पाटील, डीएम कार्डिओलॉजिस्ट डॉ. वैभव पाटील व डॉ. अनिकेत पाटील यांनी आयोजकांचे कौतुक केले.