महापालिकेच्या कामकाजाचे धडे घेण्यासाठी जळगावचे नगरसेवक नाशिकला रवाना

अखिल भारतीय स्थानिक स्वराज्य संस्थेच्या दोन दिवसीय प्रशिक्षण शिबिरात तज्ज्ञांचे मार्गदर्शन

लेवाजगत न्यूज जळगाव : महानगरपालिकेचे कामकाज, कायदे, नियमावली आणि प्रशासकीय प्रक्रिया यांचा सखोल अभ्यास करून लोकप्रतिनिधी म्हणून अधिक प्रभावीपणे काम करता यावे, यासाठी जळगाव शहर महानगरपालिकेचे नगरसेवक नाशिक येथे आयोजित करण्यात आलेल्या विशेष प्रशिक्षण शिबिरासाठी रवाना झाले.

अखिल भारतीय स्थानिक स्वराज्य संस्थेच्या वतीने नाशिक येथे हे दोन दिवसीय विशेष प्रशिक्षण शिबिर आयोजित करण्यात आले आहे. या शिबिरात महानगरपालिकेच्या दैनंदिन कामकाजासह विविध कायदे व नियम, आर्थिक नियोजन, अर्थसंकल्पीय प्रक्रिया, प्रशासकीय कार्यपद्धती तसेच लोकप्रतिनिधींच्या जबाबदाऱ्या याबाबत तज्ज्ञांकडून मार्गदर्शन करण्यात येणार आहे.

महानगरपालिकेच्या माध्यमातून नागरिकांना मूलभूत सुविधा उपलब्ध करून देणे, शहरातील विविध विकासकामांना चालना देणे तसेच नागरिकांच्या समस्या प्रशासनापर्यंत प्रभावीपणे पोहोचविणे ही नगरसेवकांची महत्त्वाची जबाबदारी आहे. त्यासाठी महानगरपालिकेच्या कारभाराची सखोल माहिती आणि प्रशासकीय प्रक्रियेचे ज्ञान असणे आवश्यक आहे.

या प्रशिक्षणामुळे नगरसेवकांना महापालिकेच्या कामकाजातील विविध पैलू समजून घेण्यास मदत होणार असून, नागरिकांच्या प्रश्नांची प्रभावी मांडणी करण्यास तसेच विकासकामांच्या नियोजनात अधिक सक्रिय सहभाग घेण्यास मदत होईल, असा विश्वास व्यक्त करण्यात आला.

प्रशिक्षित आणि अभ्यासू लोकप्रतिनिधी हे सक्षम, पारदर्शक आणि लोकाभिमुख प्रशासनाचे आधारस्तंभ आहेत. या प्रशिक्षणातून मिळणाऱ्या ज्ञानाचा उपयोग जळगाव शहराच्या विकासासाठी आणि नागरिकांच्या हितासाठी करण्याचा संकल्प नगरसेवकांकडून व्यक्त करण्यात आला.

ज्ञान, प्रशिक्षण आणि लोकसेवेच्या माध्यमातून विकसित जळगावच्या दिशेने हे आणखी एक सकारात्मक पाऊल मानले जात आहे.