जानकीबाई जनार्दन ठाकूर स्कूलमध्ये ऑगस्ट क्रांती दिन उत्साहात साजरा

आवरे प्रतिनिधी : प्रो. प्रशांत म्हात्रे-

भारतीय स्वातंत्र्य हे त्याग आणि बलिदानाचे प्रतीक आहे. स्वातंत्र्यसंग्रामासाठी क्रांतिवीरांनी दिलेला लढा प्रत्येकाने जाणून घेऊन त्यातून प्रेरणा घ्यावी, असे प्रतिपादन यावेळी करण्यात आले.

भारतीय स्वातंत्र्यसंग्रामातील महत्त्वपूर्ण दिवस म्हणून ओळखला जाणारा ऑगस्ट क्रांती दिन आवरे येथील जानकीबाई जनार्दन ठाकूर स्कूल इंग्लिश मीडियम विद्यालयात मोठ्या उत्साहात साजरा करण्यात आला.

८ ऑगस्ट १९४२ रोजी महात्मा गांधी यांनी ‘करो या मरो’चा नारा देत ब्रिटिश सत्तेविरुद्ध भारत छोडो आंदोलनाची हाक दिली. या आंदोलनाने स्वातंत्र्यलढ्याला निर्णायक दिशा मिळाली. या ऐतिहासिक दिवसाचे स्मरण विद्यार्थ्यांना व्हावे आणि स्वातंत्र्यसैनिकांच्या त्यागाची जाणीव व्हावी, या उद्देशाने विद्यालयात विविध उपक्रमांचे आयोजन करण्यात आले.

कार्यक्रमाच्या सुरुवातीला भारतीय स्वातंत्र्यलढ्यातील थोर क्रांतिवीर तसेच आत्माराम स्कूल मिशन संस्थेचे संस्थापक-अध्यक्ष स्वर्गीय अशोक ठाकूर सर यांच्या स्मृतीस विनम्र अभिवादन करण्यात आले.

यावेळी विद्यार्थ्यांनी देशभक्तीपर भाषणे करून स्वातंत्र्यसंग्रामातील महान क्रांतिकारकांच्या कार्याची माहिती दिली. त्यांच्या त्याग, संघर्ष आणि बलिदानातून आजच्या पिढीने प्रेरणा घेण्याचे आवाहन करण्यात आले.

विद्यार्थ्यांच्या भाषणातून स्वातंत्र्यसंग्रामातील क्रांतिवीरांनी देशासाठी दिलेला लढा हा आजच्या पिढीसाठी प्रेरणादायी असल्याचे अधोरेखित झाले. स्वातंत्र्यसैनिकांच्या विचारांतून देशप्रेम, राष्ट्रनिष्ठा आणि जबाबदार नागरिक म्हणून जीवन जगण्याची प्रेरणा मिळते, असा संदेश विद्यार्थ्यांनी दिला.

विद्यालयाच्या मुख्याध्यापिका सौ. निकिता म्हात्रे यांच्या मार्गदर्शनाखाली आयोजित या कार्यक्रमात शिक्षकवृंद, शिक्षकेतर कर्मचारी आणि विद्यार्थ्यांनी उत्स्फूर्त सहभाग घेतला. देशभक्तीपूर्ण वातावरणात कार्यक्रम उत्साहात पार पडला.