स्वर्गीय अशोक ठाकूर सर यांच्या ५८ व्या जयंतीनिमित्त आवरे येथे विनम्र अभिवादन

स्वर्गीय अशोक ठाकूर सर यांच्या ५८ व्या जयंतीनिमित्त आवरे येथे विनम्र अभिवादन

आवरे | प्रतिनिधी (प्रा. प्रशांत म्हात्रे)-

ग्रामीण भागातील विद्यार्थ्यांना जागतिक दर्जाचे इंग्रजी शिक्षण मिळावे, हे स्वप्न उराशी बाळगून त्यासाठी आयुष्यभर कार्य करणारे शिक्षणप्रेमी स्वर्गीय अशोक ठाकूर सर यांच्या ५८ व्या जयंतीनिमित्त आत्माराम ठाकूर मिशन संचलित जानकीबाई जनार्दन ठाकूर इंग्लिश मिडियम स्कूल, आवरे येथे विनम्र अभिवादन करण्यात आले.

आजचे युग विज्ञान व तंत्रज्ञानाचे असल्याची जाणीव ठेवून ग्रामीण भागातील विद्यार्थ्यांना इंग्रजी भाषेचे भक्कम शिक्षण मिळावे या उद्देशाने स्वर्गीय अशोक ठाकूर सर यांनी २००६ साली आवरेसारख्या ग्रामीण भागात जानकीबाई जनार्दन ठाकूर इंग्लिश मिडियम स्कूलची स्थापना करण्यासाठी मोलाचे योगदान दिले. त्यांच्या दूरदृष्टीमुळे आज या विद्यालयातील विद्यार्थी आत्मविश्वासाने इंग्रजी बोलतात, हे या संस्थेचे वैशिष्ट्य ठरले आहे.

अत्यंत प्रतिकूल परिस्थितीत शिक्षण पूर्ण करून विज्ञान शाखेत पदवी मिळविण्याचा मान त्यांनी मिळविला. त्यानंतर अध्यापनाचा डिप्लोमा पूर्ण करून त्यांनी शिक्षक म्हणून कार्य सुरू केले. गणित, विज्ञान आणि इंग्रजी यांसारखे कठीण विषय ते अत्यंत सोप्या आणि प्रभावी पद्धतीने विद्यार्थ्यांना शिकवत असत. तसेच **'अशोका स्पीकिंग क्लासेस'**च्या माध्यमातून अनेक विद्यार्थी, डॉक्टर, वकील आणि व्यावसायिकांना इंग्रजी संभाषणाचे प्रशिक्षण देऊन त्यांनी समाजात शैक्षणिक परिवर्तन घडवून आणले.

शैक्षणिक आणि सामाजिक कार्याच्या बळावर ग्रामीण भागातील युवकही राष्ट्रीय स्तरावर यश मिळवू शकतो, हे त्यांनी सिद्ध केले. त्यांच्या उल्लेखनीय कार्याची दखल घेत भारत सरकारकडून त्यांना २००३ सालचा नेहरू युवा पुरस्कार प्रदान करण्यात आला होता.

जयंतीनिमित्त आयोजित कार्यक्रमात विद्यार्थी मौर्य गावंड यांनी मनोगत व्यक्त केले. निवास गावंड सर यांनी स्वर्गीय अशोक ठाकूर सर यांच्या जीवनकार्याचा आढावा घेत विद्यार्थ्यांना प्रेरणादायी मार्गदर्शन केले. विद्यालयाच्या मुख्याध्यापिका सौ. निकिता म्हात्रे यांनीही सरांच्या शैक्षणिक योगदानाविषयी मनोगत व्यक्त केले. ज्ञानेश्वर गावंड सर यांनी "अशोक ठाकूर सर हे खऱ्या अर्थाने विद्यार्थीप्रिय शिक्षक होते," असे गौरवोद्गार काढले.

कार्यक्रमाच्या प्रारंभी स्वर्गीय अशोक ठाकूर सर यांच्या प्रतिमेस पुष्पहार अर्पण करून भावपूर्ण अभिवादन करण्यात आले. यावेळी विद्यालयातील शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते.

स्वर्गीय अशोक ठाकूर सर यांनी रुजविलेली शिक्षणाची प्रेरणा आणि समाजसेवेचा वारसा पुढील पिढ्यांसाठी कायम प्रेरणादायी राहील, अशा भावना यावेळी व्यक्त करण्यात आल्या.