कृषी महाविद्यालयात नवोदित विद्यार्थ्यांचा दीक्षारंभ; नियमित उपस्थिती व प्रात्यक्षिक ज्ञानावर भर

 

कृषी महाविद्यालयात नवोदित विद्यार्थ्यांचा दीक्षारंभ; नियमित उपस्थिती व प्रात्यक्षिक ज्ञानावर भर

जळगाव, दि. २१ सप्टेंबर २०२६ : गोदावरी फाउंडेशन संचालित डॉ. उल्हास पाटील कृषी व अन्न तंत्रज्ञान महाविद्यालयात नवीन शैक्षणिक वर्षाच्या प्रारंभानिमित्त प्रथम वर्षाच्या नवोदित विद्यार्थ्यांसाठी दीक्षारंभ कार्यक्रमाचे आयोजन करण्यात आले.

यावेळी विद्यार्थ्यांनी महाविद्यालयाच्या कृषी कॅम्पसमधील विविध सोयी-सुविधांचा पुरेपूर उपयोग करून नियमित वर्गांना उपस्थित राहावे आणि शंभर टक्के उपस्थितीचे उद्दिष्ट ठेवावे, असा सल्ला प्रमुख पाहुण्यांनी दिला.

मार्गदर्शन करताना प्रमुख पाहुण्यांनी सांगितले की, कृषी क्षेत्रात करिअरच्या अनेक संधी उपलब्ध असून केवळ पदवी मिळविणे पुरेसे नाही. विद्यार्थ्यांकडे प्रात्यक्षिक ज्ञान आणि प्रत्यक्ष अनुभव असणे आवश्यक आहे. महाविद्यालयाचा विस्तीर्ण कृषी कॅम्पस, अत्याधुनिक प्रयोगशाळा आणि संशोधनाच्या संधी विद्यार्थ्यांच्या बौद्धिक व व्यावसायिक विकासासाठी महत्त्वपूर्ण आहेत. त्यामुळे विद्यार्थ्यांनी वर्गातील शिक्षणासोबतच कॅम्पसमधील विविध प्रात्यक्षिक उपक्रमांमध्ये सक्रिय सहभाग घ्यावा, असे आवाहन करण्यात आले.

नियमित वर्ग आणि उपस्थितीच्या महत्त्वावरही यावेळी विशेष भर देण्यात आला. नियमित उपस्थितीमुळे विषयांच्या संकल्पना अधिक स्पष्ट होतात तसेच प्राध्यापकांशी थेट संवाद साधून शंकांचे निरसन करता येते. अभ्यासासोबत प्रात्यक्षिक अनुभव घेतल्यास विद्यार्थ्यांना भविष्यात कृषी शास्त्रज्ञ, अधिकारी, संशोधक किंवा कृषी उद्योजक म्हणून वाटचाल करण्यास मदत होईल, असा विश्वास व्यक्त करण्यात आला.

कार्यक्रमास कृषी महाविद्यालयाचे प्राचार्य डॉ. शैलेश तायडे, कृषी व अन्न तंत्रज्ञान महाविद्यालयाचे प्राचार्य डॉ. अशोक चौधरी, कृषी अभियांत्रिकी महाविद्यालयाच्या प्राचार्य डॉ. पूनमचंद सपकाळे यांच्यासह उपप्राचार्य प्रविण देवरे, प्रशासकीय अधिकारी मोहन सूर्यवंशी, प्रा. शरद पाटील, प्रा. निलेश सदर, प्रा. वैभव पाटील, डॉ. ज्ञानेश्वर सिंग, डॉ. अंकित आलोक, प्रा. कार्तिक खर्चे, प्रा. गौरव बाविस्कर, प्रा. सुशिल चव्हाण, प्रा. प्रियल राठी, प्रा. सायली विधाटे, प्रा. जागृती ठाकरे, प्रा. माधुरी भोळे यांच्यासह शिक्षकेतर कर्मचारी, प्रथम वर्षाचे विद्यार्थी आणि पालक मोठ्या संख्येने उपस्थित होते.

कार्यक्रमाचे सूत्रसंचालन रिया देशमुख आणि पार्थ पवार यांनी केले. डॉ. ज्ञानेश्वर सिंग यांनी आभार मानले.