स्टेट बँकेवर भोकर येथे सशस्त्र दरोडा; ग्रामस्थांच्या सतर्कतेने तीन संशयित ताब्यात भरदिवसा बँकेत घुसून व्यवस्थापक व कॅशियरला मारहाण; रोकड आणि सोन्याचे दागिने लुटून दरोडेखोरांचा पलायनाचा प्रयत्न

 

स्टेट बँकेवर भोकर येथे सशस्त्र दरोडा; ग्रामस्थांच्या सतर्कतेने तीन संशयित ताब्यात

भरदिवसा बँकेत घुसून व्यवस्थापक व कॅशियरला मारहाण; रोकड आणि सोन्याचे दागिने लुटून दरोडेखोरांचा पलायनाचा प्रयत्न

जळगाव | प्रतिनिधी

जळगाव तालुक्यातील भोकर येथील भारतीय स्टेट बँकेच्या शाखेवर शनिवारी (दि. ३१ ऑक्टोबर) दुपारी सुमारे अडीच वाजेच्या सुमारास सशस्त्र दरोडा पडल्याची खळबळजनक घटना घडली. दुचाकींवरून आलेल्या पाच ते सहा अज्ञात दरोडेखोरांनी बँकेत प्रवेश करून शस्त्रांचा धाक दाखवत कर्मचाऱ्यांना मारहाण केली. या घटनेमुळे परिसरात एकच खळबळ उडाली आहे.

मिळालेल्या प्राथमिक माहितीनुसार, शनिवारी दुपारी बँकेत ग्राहकांची वर्दळ तुलनेने कमी असल्याची संधी साधून दरोडेखोरांनी बँकेत प्रवेश केला. सुरुवातीला पाच ते सहा जण दुचाकींवरून आले होते. बँकेत शिरल्यानंतर त्यांनी कर्मचाऱ्यांना शस्त्रांचा धाक दाखवून दहशत निर्माण केली. त्यानंतर बँक व्यवस्थापक आणि कॅशियरला मारहाण करून खुर्चीला बांधून ठेवण्यात आले.

दरोडेखोरांनी बँकेतील तिजोरीतून रोकड रक्कम आणि सोन्याचे दागिने बॅगांमध्ये भरले. त्यानंतर दुचाकींवरून जळगावच्या दिशेने पलायन केले. भरदिवसा घडलेल्या या घटनेमुळे बँक परिसरासह संपूर्ण गावात भीतीचे वातावरण निर्माण झाले.

डिकसाईजवळ ग्रामस्थांची सतर्कता; पाठलाग करून संशयितांना पकडले

दरोड्यानंतर संशयितांच्या हालचाली डिकसाई गावाजवळ काही ग्रामस्थांच्या निदर्शनास आल्या. ग्रामस्थांनी प्रसंगावधान राखत संशयितांचा पाठलाग केला. यावेळी ग्रामस्थांच्या सतर्कतेमुळे एका संशयिताला पकडण्यात यश आले. त्यानंतर अन्य ठिकाणी आणखी दोन संशयितांना ताब्यात घेण्यात आल्याची प्राथमिक माहिती समोर आली आहे. अशा प्रकारे तीन संशयित पोलिसांच्या ताब्यात असल्याचे सांगण्यात येत आहे.

पोलिसांची धावपळ; फरार साथीदारांचा शोध सुरू

घटनेची माहिती मिळताच जळगाव तालुका पोलिसांनी घटनास्थळी धाव घेतली. ताब्यात घेतलेल्या संशयितांची चौकशी सुरू असून फरार साथीदारांचा शोध घेण्यासाठी पोलिसांकडून नाकाबंदी आणि शोधमोहीम राबविण्यात येत आहे. जळगाव तालुका पोलीस ठाण्याचे निरीक्षक शशिकांत पाटील आणि त्यांचे पथक या प्रकरणाचा तपास करीत आहेत.

लुटीचा नेमका आकडा अद्याप अस्पष्ट

या दरोड्यात नेमकी किती रोकड रक्कम आणि किती किमतीचे सोन्याचे दागिने लुटण्यात आले, याचा अधिकृत आकडा अद्याप समोर आलेला नाही. बँकेतील नोंदी आणि तिजोरीची तपासणी केल्यानंतरच लुटीचा नेमका तपशील स्पष्ट होणार आहे.

भरदिवसा बँकेत झालेल्या या सशस्त्र दरोड्यामुळे भोकरसह परिसरात मोठी खळबळ उडाली असून ग्रामस्थांच्या सतर्कतेमुळे तीन संशयित ताब्यात आल्याने पोलिसांच्या तपासाला महत्त्वाची दिशा मिळाली आहे.