बडतर्फ पीएसआयचा कारागृहातून दरोड्याचा कट; बंदुकीच्या धाकावर एसबीआय बँक लुटली!

 

भोकर बँक दरोडा प्रकरणाचा थरार! बडतर्फ पीएसआयने कारागृहात रचला कट; ३५ कोटींचे सोने, १५ लाखांची रोकड लुटली

बंदुकीचा धाक दाखवत रोखपाल व मॅनेजरला सोने देण्यास केले विवश; पोलिसांची दोन तासांत कारवाई, मास्टरमाइंडसह चौघे ताब्यात

भोकर लेवाजगत न्यूज प्रतिनिधी-

जळगाव तालुक्यातील भोकर येथील स्टेट बँक ऑफ इंडिया शाखेत शनिवारी दुपारी अडीच वाजेच्या सुमारास भरदिवसा पडलेल्या दरोड्याने संपूर्ण जिल्ह्यात खळबळ उडाली आहे. दोन स्पोर्ट्स दुचाकींवर हेल्मेट आणि मास्क घालून आलेल्या चार दरोडेखोरांनी बँकेत प्रवेश करत रोखपाल आणि व्यवस्थापकाच्या कानाला बंदूक लावून त्यांना सोने देण्यास विवश केले. बँकेतील १६ लॉकरमधून सुमारे ३५ कोटी रुपयांचे सोने आणि १५ लाख रुपयांची रोकड लुटून दरोडेखोरांनी पलायन केले. मात्र, पोलिसांनी ग्रामस्थ आणि पोलिस पाटलांच्या मदतीने परिसरात नाकाबंदी करून अवघ्या दोन तासांत चारही संशयितांना मुद्देमालासह ताब्यात घेतले. या दरोड्याचा मास्टरमाइंड बडतर्फ पोलीस उपनिरीक्षक असल्याची धक्कादायक माहिती समोर आली आहे. त्याने कारागृहात असतानाच दरोड्याचा कट रचल्याचे वृत्त आहे.

दोन दुचाकींवरून आले चार दरोडेखोर

भोकर गावातील हमरस्त्यावर स्टेट बँकेची शाखा आहे. शनिवारी दुपारी अडीच वाजेच्या सुमारास दोन स्पोर्ट्स दुचाकींवरून चार जण बँकेच्या परिसरात आले. हेल्मेट आणि मास्क घातल्यामुळे त्यांची ओळख लपवली गेली होती. बँकेत प्रवेश करताच त्यांनी रोखपाल आणि बँक व्यवस्थापक जयेश राणे यांना बंदुकीचा धाक दाखवला. त्यांच्या कानाला बंदूक लावून लॉकर रूममध्ये नेण्यास सांगितले. कर्मचाऱ्यांनी विरोध केला असता दरोडेखोरांनी दोन राऊंड फायर केल्याने बँकेत एकच घबराट उडाली.

१६ लॉकरमधील सोने आणि १५ लाखांची रोकड लुटली

दरोडेखोरांनी व्यवस्थापक आणि कर्मचाऱ्यांना धमकावत बँकेतील १६ लॉकर उघडण्यास भाग पाडले. लॉकरमधील सोन्याचे दागिने आणि सुमारे १५ लाख रुपयांची रोकड सहा बॅगांमध्ये भरून त्यांनी घटनास्थळावरून पळ काढला. लुटलेल्या सोन्याचे मूल्य सुमारे ३५ कोटी रुपये असल्याची प्राथमिक माहिती आहे.

संभाजी पवार यांच्या सतर्कतेमुळे घटनेची माहिती पोलिसांना

दरोड्याची घटना समोर येताच भोकर येथील पोलीस पाटील संभाजी पाटील यांचे सासरे संभाजी पवार यांनी तालुका पोलीस ठाण्याचे कर्मचारी दिनेश चव्हाण यांना घटनेची माहिती दिली. दिनेश चव्हाण यांनी तातडीने पोलीस निरीक्षक शशिकांत पाटील आणि पोलीस नियंत्रण कक्षाला माहिती कळवली. त्यानंतर पोलीस यंत्रणा तातडीने कामाला लागली.

चार प्रमुख मार्गांवर नाकाबंदी; दोन तासांत चौघे ताब्यात

दरोडेखोरांना पळून जाण्याची संधी मिळू नये, यासाठी पोलिसांनी ग्रामस्थ आणि पोलीस पाटलांच्या मदतीने करंज, आमोदा-जळगाव, आमोदा-विदगाव आणि भोकर-डिकसाई या चार मार्गांवर नाकाबंदी केली. भोकर, करंज आणि आमोदा फाटा परिसरात ग्रामस्थांनी रस्त्यावर ट्रॅक्टर उभे करून दरोडेखोरांचा मार्ग अडवण्याचा प्रयत्न केला.

दरम्यान, दरोडेखोर वेगवेगळ्या दिशांनी पळू लागले. पोलिस आणि ग्रामस्थांनी त्यांचा पाठलाग सुरू ठेवला. अखेर अवघ्या दोन तासांत चारही संशयितांना पकडण्यात यश आले. या कारवाईत लुटलेला मुद्देमालही हस्तगत करण्यात आला.

ओळख लपवण्यासाठी एकावर एक कपडे

दरोड्यानंतर पाठलाग झाला किंवा पकडले जाण्याची वेळ आली, तर वरचे कपडे काढून ओळख लपवता यावी, यासाठी चौघांनी एकावर एक असे दोन ते तीन शर्ट, टी-शर्ट आणि पँट घातल्या होत्या. सीसीटीव्ही फुटेजमध्ये किंवा पोलिसांनी दिलेल्या वर्णनावरून ओळख पटू नये, हाही त्यामागील उद्देश असल्याचे तपासात समोर आले आहे.

रेल्वे पुलाजवळ चार बॅगा फेकल्या

ग्रामस्थांनी दुचाकींवरून पाठलाग सुरू केल्यानंतर दरोडेखोर वेगवेगळ्या दिशांनी पळाले. शंकर जासक आणि गजानन पवार एका दुचाकीवरून धरणगावच्या दिशेने जात असताना चावलखेड्याजवळील रेल्वे पुलावर त्यांनी सोबतच्या चार बॅगा फेकून दिल्या. याची माहिती ग्रामस्थांनी पोलिसांना दिली. नियंत्रण कक्षाकडून माहिती मिळताच पोलीस उपनिरीक्षक उमाकांत बडगुजर हे पथकासह घटनास्थळी पोहोचले.

पाठलाग चुकवण्यासाठी दीड लाख रुपये रस्त्यावर फेकले

पोलिस आणि ग्रामस्थांचा पाठलाग चुकवण्यासाठी दरोडेखोरांनी आणखी एक युक्ती केली. मागे बसलेल्या एका दरोडेखोराने लुटलेल्या रोकडमधील सुमारे दीड लाख रुपये रस्त्यावर फेकून दिले. पाठलाग करणाऱ्यांचे लक्ष विचलित करून पळून जाण्याचा त्यांचा प्रयत्न होता. मात्र, पोलिस आणि ग्रामस्थांनी पाठलाग सुरूच ठेवल्याने त्यांची ही युक्ती निष्फळ ठरली.

ग्रामस्थांच्या घरी गेलेली बॅगही पोलिसांनी मिळवली

दरोडेखोरांनी फेकलेली एक बॅग भोकर गावातील एका व्यक्तीने घरी नेली होती. याची माहिती मिळाल्यानंतर अपर पोलीस अधीक्षक यांच्या वाहनाचे चालक नरेंद्र पाटील यांनी संबंधित व्यक्तीच्या घरी जाऊन ती बॅग ताब्यात घेतली. त्यामुळे लुटलेल्या मुद्देमालाच्या शोध मोहिमेला आणखी यश मिळाले.

मास्टरमाइंड बडतर्फ पीएसआयसह चौघे ताब्यात

या दरोडा प्रकरणात बडतर्फ पोलीस उपनिरीक्षकासह चार संशयितांना पोलिसांनी ताब्यात घेतले आहे. त्यांची नावे पुढीलप्रमाणे आहेत.

१. शंकर रमेश जासक – बडतर्फ पोलीस उपनिरीक्षक, रा. खेडी, जळगाव.

२. अंकुश श्रावण चव्हाण – रा. रामदेववाडी, ता. जळगाव.

३. गजानन राजेंद्र पवार – रा. न्यायडोंगरी, जि. नाशिक.

४. अंकुश तुळशीराम चव्हाण – रा. खापरखेडा.

बडतर्फ पीएसआय शंकर रमेश जासक याने कारागृहात असतानाच या दरोड्याचा कट रचल्याची माहिती समोर आली आहे. दरोड्यापूर्वी फेरीवाला बनून बँकेची रेकी करण्यात आल्याचेही वृत्त आहे. या कटात आणखी कोणाचा सहभाग होता, दरोड्याचे नियोजन कसे करण्यात आले आणि लुटलेल्या मुद्देमालाची संपूर्ण रक्कम किती आहे, याचा तपास सुरू आहे.

तीन वर्षांपूर्वीही दरोड्याचा प्रयत्न

या टोळीची गुन्हेगारी पार्श्वभूमी तपासताना तीन वर्षांपूर्वीच्या दरोड्याच्या प्रयत्नाची माहितीही समोर आली आहे. २०२३ मध्ये जळगाव शहरातील कालिंकामाता मंदिर परिसरातील स्टेट बँक शाखेत दरोड्याचा प्रयत्न झाल्याची घटना घडली होती. त्या घटनेतील धागेदोरे आणि भोकर येथील दरोडा यांचा काही संबंध आहे का, याचाही तपास केला जात आहे.

भरदिवसा बँकेत घुसून कोट्यवधी रुपयांचे सोने आणि लाखोंची रोकड लुटण्याची घटना, त्यानंतर ग्रामस्थांनी दाखवलेली सतर्कता आणि पोलिसांनी अवघ्या दोन तासांत केलेली कारवाई यामुळे भोकर परिसरात मोठी चर्चा सुरू आहे. या प्रकरणातील पुढील तपासातून आणखी कोणते खुलासे होतात, याकडे जिल्ह्याचे लक्ष लागले आहे.